AMANG PANDIR: Galuh Belajar Bagawi
-
- 4 October 2021
Pengantar Redaksi: secara periodik diunggah kisah Amang Pandir dari edisi-edisi lama secara acak yang dikompilasi di Ventimiglia Digital sebagai salah satu cara pelestarian tulisan yang pernah dimuat dalam edisi Ventimiglia versi cetak. Selamat menikmati khasanah banua!
Parak semester akhir, Galuh baiisi banyak waktu longgar. Maklum inya tinggal manyusun sakaripsi haja. Makanya Galuh mamikirakan kegiatan nang produktif jar urang. Inya malamar bagawi paruh waktu di sebuah Cafe di daerah Veteran. Abah wan mamanya satuju haja inya bagawi, supaya kenal dunia nyata.
Kada tarasa sudah tiga bulan Galuh bagawi. Pina basamangat tarus, tiap hari tulak manunggang sapida mutur, saragam rapi, minyak harum bakibar-kibar. Himung jua abah mamanya, wan panasaran apa nang dihadapinya di wadah bagawi.
Sore itu Amang Pandir bulik bagawi, langsung duduk di teras sambil ngopi wan makan ketela goreng. Sangaja Amang Pandir wan Acil Bungas dudukan sambil mahadang Galuh anak samata wayangnya bulik bagawi. “Nah itu Galuh lewat titian muka rumah!” ujar Amang Pandir.
“Oiii Galuh, selawas Pian bagawi kada pernah lagi kita ngubrul santai, perasaan Abah sudah dua puluh tahun kita kada bapandiranlah…”
Digayai Abahnya, gantian Galuh mambalas,”Maaflah, siapa pian? Apakah kita sudah batamu sabalumnya?”
Acil Bungas langsung ai menyudahi bagayaan bapak-anak ini,”Sudah…sudah…Galuh kasinian, Abah Mama handak manakuni nangkaya apa kuliah wan gawian Pian? Pina mistiriyus semua!”
Galuh santai mamarkir sapida muturnya, mamacul sapatu wan mandatangi kursi rotan parak Mamanya. “Ada apa Abah Mama ini heboh banar. Santai haja Abah, Ibu Kota sudah parak.”
“Hush, ini Abah Mama was was mamikirakan keadaan Pian. Ujar skripsi, tapi pina kada sing tuntungan. Rasanya selawas bagawi Pian pina kada mamikirakan kuliah lagi.”
“Abah Mama tenang haja, semunyaan dalam kuntrul ulun!” ujar Galuh mahibur orang tuhanya.
“Abah hawatir, semalam malihat di tipi ada pengunjung kafe nang ditangkap pulisi gegara maedar narkoba…” Acil Bungas manyambung,”Itu jua ujar urang cafe gasan wadah janjian nang salingkuh.”
“Aduuuuh, makanya Abah Mama baelang ke wadah Ulun bagawi di Cafe, hanyar komen, jangan mandangarakan ujar urang!”
“Ujar Agus Pentol, cafe itu lampunya remang-remang, banyak Om-Om iseng!” makin naik suara Amang Pandir dibari jawaban nang kada mamuasakannya anak semata wayangnya.
“Sabar Abah Mama, cafe itu mirip-mirip warung Acil Siti, hanya saja ini moderen, tradisionil musuh kakinian lah. Bajual kupi hirang jua, dibari ngaran black coffee, haraganya langsung selisih sapuluh kali lipat! Di wadah Acil Siti musiknya Emon ewer-ewer ambyar, kalu di cafe ya jelas band komplit biduan bungas-bungas.”
“Akhayaa, Abah magin curiga, pasti banyak nang manggoda Pian loo?”
Galuh ragu manjawab, inya pina kada handak manjawab. Mamanya langsung tumbur,”Nhaa katakan nang sebujurnya Galuh, Mama jadi was-was wan khawatir!”
“Iya sih Ma…”
“Haaaaaah!” tasambur kupi Amang Pandir wan talambung Mama Galuh.
“Banyak nang batakun siapa ngaran ulun, rumah ulun dimana, minta nomor HP ulun jua…”
“Haaaaah! Lalu ikam barikah?” ujar Acil Bungas wan Amang Pandir serentak.
“Tergantung Bah…, kalu bungas wan bonafit ya ulun bari.”
“Haaaaah!” kuriak Acil Bungas wan Amang Pandir serentak lagi.
Balum sampat manginterogasi labih mandalam, HP Galuh bardaring.
Galuh malihat HP-nya, badadas bajauh dari orang tuhanya sambil tasanyum himung.
“Hallo Pak Joni apa kabar?”
Acil Bungas wan Amang Pandir langsung batatapan muha sambil bagumam lirih,”Pak Joni….”
“Bisa saja Pak Joni, kita batamu jam 12 siang,” jawab Galuh.
Langsung saja Amang Pandir hamuk, muha mahabang sangit banar sidin malihat kalakuan anaknya!
Amang Pandir bukah mamaraki Galuh, langsung disambarnya HP Galuh dari tangannya!
“Siapa ini! Jangan coba-coba mangganggu anak saya!” kata Amang Pandir di HP Galuh.
Suara di seberang telepon langsung siaga,”Hallo Pak, saya Joni….”
“Joni siapa!” makin naik tekanan darah Amang Pandir.
“Joni….Joni dosen pembimbing skripsi Galuh….”
“Akhaaayaaaaaaa!” teriak Amang Pandir, pucat sidin. (oZo)
- +) Telah dimuat di Ventimiglia cetak edisi 53 Juli-Agustus 2019
