Amang Pandir: Pastur Joni Pindah Tugas

“Abahnya, pian sudah mandangar habar kah kalu Pastur Joni pindah tugas?”

“Balum Umanya-ai, biasa jua kalu pastur bapindah tugas?” jawab Amang Pandir.

‘ini nang maulah ulun batatakun, hanyar dua tahun tugas sudah dipindah urang, maklum jua Pastur Joni itu bungas, kalu homili pas banar di hati ulun, banyak ibu-ibu nang suka lawan sidin, tamasuk ulun ngefans barat.”

“Nah ini… nang kakaya ini nang bisa maulah camuh pandiran di dunia “persilatan” gereja. Umanya itu kalu bapandir hati-hati, kaina manimbulakan pitnah wan gusip nang kada-kada.” Prihatin Amang Pandir

“Buleh haja kalu bapandapat, sirik banar pian ney,” ujar Acil Bungas malawani lakinya.

“Makanya waktu pastur Joni datang, sidin manganalakan diri di garija, pas pindah  pastor Joni juga pamitan handak tulak kamana, pasti sidin bapadah. Kada bukah sorangan,” ujar Amang Pandir.

“Jadi pindah kamana sidin itu Abahnya ai?” tanya Acil Bungas panasaran.

“Umanya tu dangarakan kalu pastur humili atawa sidin menyampaikan pangumuman, kada haur sorangan malihati arluji.”

‘Huuu, kadanya kayatu pang. Ulun katuju kalu sidin humili, biar sejam sidin hutbah kadapapa, katuju ja ulun.”

“Aku nang gantian malihati arlujiku amun sejam, hahaha! Balik ka laptop nah, Pastur Joni itu handak disakulahakan di Roma sana, kabalujuran masih hanum wan pintar sidin tu. Jaka seumuran aku ni sidin hanyar pindah, pasti masuk rumah jompo am.”

“Hush Abahnya ney. Eh..jadi Pastur Joni itu handak sakulah pulanglah? Masih kurang lagikah pintarnya? Cuba balajar lawan pian Abahnya ai, kaina jadi kapintaran sidin.”

“Akhaay…Umanya ini pelecehan ngarannya. Sesuai kaparluan garija gasan maharagu umat maka macam-macam ilmu itu nang harus dipalajari buhan pastur jua.”

“Ujar urang nang balum pintar haja nang disakulahakan Abahnya ai?”

“Nah ikam, tamakan huaks jua pian sakalinya leh!” takajut-kajut Amang Pandir.

“Jangan kalawasan sakulah, kaina kada ingat maharagu umat. Apalagi nang kaya kita ini umat kampung intang pinggir banyu haja, apa sidin kaina masih hakun manjanguk kitalah?” ujar Acil Bungas manduga-duga.

“Aku itu selalu sangka baik, pastur kita itu sudah mahakuni jalan hidup nangkaya itu, pasti ai sidin tatap hakun manjanguki buhan kita, maharagu domba-domba nang biasa-biasa haja supaya manjadi domba nang baik.”

“Aii aii pintar banar pian Abahnya ai, kawa mambari panjalasan wan pancarahan gasan urang lain. Kalu banyak urang bapikiran nang kaya pian itu lakas banar Arah Dasar Kauskupan tawujud.”

“Akhaayahhhh…., jauhnya layau bapandir sampai ka Arah Dasar Umanya ni! Nang panting kita baiisi pikiran, pandiran wan parbuatan nang baik. Apalagi kita rancak diingatkan mandoakan bubuhan pastur wan biarawan-biarawati supaya tatap setia, sehat, samangat wan gumbira dalam palayanannya.”

“Ayuha Abahnya ai, tarima kasih sudah babagi nasihat. Pian kudoakan jua supaya lakas diterima…”

“Eiit, jangan salah sambat! Aku masih handak hidup saribu tahun lagi, hahaha” (oZo)