Sore itu cuaca segar imbah hujan. Mulai rutin daerah Kelayan disiram hujan. Air Sungai Martapura balum lagi naik, masih tatap warna kopi kapucino nangkaya kopi nang dinginum Amang Pandir.

Kada biasanya Agus Pentol datang batamu ke wadah Amang Pandir. Namun inya ragu-ragu handak masuk halaman rumah Amang Pandir. Dilihatnya Amang Pandir wan Acil Bungas dudukan di teras rumah.

Takajut-kajut Amang Pandir wan Acil Bungas imbah malihati  diintang titian Agus Pentol badirian disitu. Langsung ai Amang Pandir bakuciak,” Akhaay, Gus, masuk ka rumah. Handak baelang ka wadah kami kah? Ayo mampir satumat!”

Hanyar Agus  Pentol wani bajalan masuk teras. Wajahnya pina bingung, nangkaya kakanakan pahuluan sasat di Duta Mall.

“Kulonuwun Amang Pandir wan Acil Bungas,” ujar Agus Pentol baucap salam ala bubuhan Wonogiri.

“Nah ikam, aku kada kawa mambalas salam ikam Gus ai pakai bahasa pawayangan, ayo masukan duduk dihiga,” Amang Pandir menyahuti Agus, “ Umanya, ulahakan kopi kapucino gasan Agus, tambahakan pisang goreng jua, muha Agus pina raum ney.”

Agus Pentol takurihing supan. “Iya ini Mang handak batakun, dua tiga hari ney maharit pandir handak ke wadah pian, handak jua maminta tolong kalu kawa.”

Amang Pandir langsung ai manyahut,” Ikam itu nang kayapa lawan kami, kita ini sudah seperti saudara, kita ini kaluwarga di Komunitas Andreas, sudah salayaknya saling tolong manolong. Ingat ujar Pastur Udin kita hidup saparti jamaah pardana.” Nah Amang Pandir pina tasulut homili Pastur Udin jua. Acil Bungas sampai manggawil,”Sadang-sadang pian bapandir, nang nurmal haja.”

Agus Pentol langsung masuk ke inti masalahnya,”Begini Mang wan Acil, kami kasulitan modal usaha. Modal kami tasedot mambantu orang tua nang sakit di Jawa. Kami hanya kawa mangirim duit semampu kami…”

Baca Juga:  Expo Religi 7 dan Mooncake Festival Banjarmasin

Pina takang bapandir maka Amang pandir manyahut“Nah, tarusakan kisah ikam Gus.”

“Ulun handak minta petunjuk nangkayapa maminjam duit di pinjaman online gasan modal usaha? Ada banyak tawaran nang ulun baca pina nyaman wan cepat. Pian kawa mambaca tulisan di tihang listrik Warung Gudheg Budhe, trus di simpang ampat Teluk Kalayan, ada jua kiriman di SMS, eee di medsos WA wan IG ulun ada jua. Pina nyaman wan saraba capat manuntasakan masalah ulun.”

Amang Pandir langsung ai bareaksi,”Akhaaaay, untunglah ikam batakun wan aku. Aku ini ibarat tokoh OJK, jangan sambarangan mamulai lawan pinjaman online nang kada tahu juntrungnya, banyak nang illegal alias kada sah. Itu di barita TV wan media online sudah banyak dipadahakan.”

Acil Bungas langsung ai melurusakan supaya lakinya kada bapandir kasana kamari,”Kalu kawa maminjam di wadah nang jelas haja Gus, misalnya ikam kawa minjam di CU, jar urang pahuluan Credit Union nang pandiriannya termasuk diparakarsai Gereja Katolik. Kalu minjam di Pinjol nang kada jelas kaabsahannya ikam bisa benjol”

Agus Pentol maangguk-angguk,” Ulun balum lagi jadi anggota CU, kada kawa cepat dapat pinjaman, lain nangkaya Pinjol langsung ai sini situ uang cair, masalah taratasi…”

“Kaya ini haja Gus, berapa gerang ikam handak maminjam?” Amang Pandir pina manantang.

“Sejuta haja pang Amang wan Acil ai, gasan modal produksi pentol enam ratus ribu, nang ampat ratus ribu gasan cadangan hidup kami,”ujar Agus Pentol.

“Sudah, bagini haja Gus, ikam kada usah kamana-mana. Kami rela haja maminjami gasan modal ikam. Kada usah babunga-bunga, ikam kawa maangsur kapan haja,”ucap Amang Pandir mantap.

Acil Bungas kali ini sebagai ekonom rumah tangga kada manyoal jua,”Kami bukan orang bakalabihan jua Gus ai, ada sedikit tabungan, biar haja ikam bisa gunakan gasan usaha.”

Baca Juga:  Meratus Punya Cerita: Peresmian Kapela Rapit dan Baksos Delegatus Kesehatan

Agus Pentol taharu, inya batitik banyu mata, susuban di hatinya tarasa pacul… hilang.

Amang Pandir mancairakan suasana,”Ayo Gus kopi kapucinonya dinginum, kaina dingin. Umanya ambilakan duitnya dinyiru, tadi basah takana hujan, moga udah karingan.”

“Huuuuu, Abahnya ney!” ujar Acil Bungas masuk ka kamar maambil duit.

Agus Pentol wajahnya pina cerah gembira,”Tarima kasih atas kabaikan pian badua. Samoga banyak orang nang mahatiakan nasib kami orang nang kada tahu harus minta tolong kamana, nangkaya papatah gasan pian nitu: orang nang baik jangan dikubur sabalum mati .”

“Akhaaay, ikam itu dapat papatah dari Hong Kong ya? Hahahaha.”

Mereka malanjutakan bapandiran, sambil nginum kopi kapucino wan pisang goreng nang tarasa nyaman sedunia. (oZo)