Sore itu Amang Pandir kalihatan manarima talipun di beranda rumah. Lawan bicara di seberang pina gugup suara. “Tenang…tenang…bisa haja, antar haja ka rumah, pasti beres.” Acil Bungas mahatiakan pandiran lakinya, apa pulang nang dihantar ka rumah jadi beres?

“Abahnya, bapandir lawan siapa pian?”

“Itu, ponakan kita, si Ilham tugas luar kota tiga hari, bininya Mutmainah masuk kantor kada kawa meliburkan diri.”
‘Masalahnya apa Abahnya?”

“Nhaa, mereka itu kan punya anak si Andre nang masih kelas 3 SD kadada nang mangganii sakulah online wan manggawi tugas. Anaknya itu pintar tapi usil. Aku minta dikirim ka rumah kita haja, biar Abah nang manangani, nyaman ja. Sore kaina dijemput mamanya pulang.”

“Ooo, Kainya lah kesahnya nang handak mangganii cucu.”

Kada sampai satangah jam Mutmainah datang mambunceng Andre naik sapida mutur. Andre mambawa tas ransel wan tas baisi baju ganti, langsung bukah mancium tangan Kainya. Mutmainah mancium tangan Amang Pandir wan Acil Bungas wan pamitan titip anaknya.

“Andre, kasini duduk parak Kai, kita mangarjakan tugas dulu, kaina hanyar maunjun di belakang rumah.”

“Asyiik Kai, babila maunjunnya? Lawas lagilah?”

“Tergantung ikam, manuntungakan tugasnya, hanyar ikam bebas bamainan.”

“Kaya apa Kai kalo kita maunjun dulu? Nini kawa ai kalo mangganii manggawi pe er ulun?”

“Dasar jua ikam, abah mama kam itu urangnya alim, mancuntu siapa ikam ini?”

Andre langsung ai malihati Kainya.

”Nah iya am…, ayo bukunya dikaluarakan, tugas nang paling sulit dulu haja, matematika! Kai nang paling jagau kalu bahitungan!”

‘Ini Kai, tugas parkalian wan pambagian. Ada dua puluh buting sualnya.”

“Pinjam HP Kai lah” ujar Andre. “Eh kok pakai HP segala?”Kainya manjulung HP.

Baca Juga:  Setahun Pandemi: Apa Kabar Pendidikan Kita?

Andre sagara mancari aplikasi kalkulator wan mamicik soalnya.

“Eeeee satup…satup…kada bulih klo pake kalkulator, pantas ai murid wahini maunya praktis!”

“Kai, coba pang, pian mahitung sorang, kawa lah pian?” tantang Andre.

“Intil cucu ai, nah setumat sat sait sut set…ini jawabnya pasti bujur!’

Andre mamicik angka di kalkulator, setumat keluar jawaban, ”Waaa Kai jawabannya salah!”

“Kai kalu pian mahitung salah, maulah pasawat tujuan ka bulan, hanyar sampai Kandangan sudah maladum salah hitung!”

Nah iya am, Kai Pandir pusang malajari Andre, lalu mangiau bininya,

” Umanya, adalah parasetamol pina kapalaku handak bakukus.”

“Sudah tuntung Kai, bolehlah santai setumat?” tanya Andre.

“Hanyar sabuting tugas sudah ampihan, ayo ambil tugas lainnya.”

“Bahasa Indonesia Kai ai, disuruh bu guru maringkas carita halaman 16-25, panjang banar Kai ai.”

“Ikam itu banyak alasan, coba Kai lihat dulu.” Kai Pandir tapaksa mambaca jua.

“Mudah saja ini, ringkas kisahnya itu kaya ini nah. ”

“Sudah Kai ai, ulun tulis ringkasan pandiran pian tadi, selesai dah”

“Nah iya am, siapa jua sabujurnya nang sakulah? Umaaanya… adalah minyak gosok kapala!”

‘Kaiii, masih dua palajaran lagi, bahasa Inggris wan komputer.”

“Akhaayaa, ikam cari Acil Galuh malajari di dalam sana, kalu bahasa pahuluan wan sempoa kawa ai Kai!”

Andre segera masuk ke dalam, Kai Pandir berasa bebas lepas dari tekanan.

“Kada tapi lawas Galuh bakuciak,”Umanya, adalah obat sakit kapala?”

Akhayaa. ! sama tia jua penyakitnya
(oZo)